ស្ទើរតែគ្រប់កម្មករជនជាតិអាមេរិកទាំងអស់អាចទទួលបានអត្ថប្រយោជន៍របបសន្តិសុខសង្គមនៅក្នុងការចូលនិវត្តន៍របស់ពួកគេដោយធ្វើការរួមចំណែកពន្ធលើប្រាក់បៀវត្សរ៍។ ប្រសិនបើអ្នកមានលក្ខណៈសម្បត្តិគ្រប់គ្រាន់ នោះអ្នកទទួលបានការទូទាត់ប្រាក់របបសន្តិសុខសង្គមប្រចាំខែចាប់ពីអាយុ 62 ឆ្នាំ។ មិនមែនគ្រប់គ្នាសុទ្ធតែទទួលបានរបបសន្តិសុខសង្គម ដូចអ្នកផ្តល់សេវាដល់មាតាបិតាមួយចំនួននោះទេ ប៉ុន្តែអ្នកនៅតែអាចមានលក្ខណៈសម្បត្តិគ្រប់គ្រាន់ដើម្បីទទួលបានអត្ថប្រយោជន៍ប្តីប្រពន្ធ ប្រសិនបើអ្នករៀបការហើយ។

ខាងក្រោម​នេះគឺជាគន្លឹះសាមញ្ញចំនួន 3 ដើម្បីជួយអ្នកឱ្យយល់ពីរបបសន្តិសុខសង្គម និងរៀបចំផែនការសម្រាប់ការចូលនិវត្តរបស់អ្នក៖

1. មើលថាតើអ្នកមានលក្ខណៈគ្រប់គ្រាន់ដែរឬទេ។ អ្នកអាចមើលថាតើអ្នកកំពុងបង់ចូលរបបសន្តិសុខសង្គមដោយមើលលើបណ្ណបើកប្រាក់បៀវត្សរ៍របស់អ្នក។ ប្រសិនបើមានការបញ្ចូល​លុយនៅក្រោម “Social Security Employee Tax (ពន្ធនិយោជិតសម្រាប់របបសន្តិសុខសង្គម)” នោះអ្នកគួរតែមានរបបសន្តិសុខសង្គម។* ស្វែងយល់បន្ថែមអំពីអត្ថប្រយោជន៍នៃការចូលនិវត្តរបស់សន្តិសុខសង្គម។
2. ប្រើម៉ាស៊ីនគិតលេខរបបសន្តិសុខសង្គមដែលងាយស្រួលប្រើនេះ។ បញ្ចូលថ្ងៃខែឆ្នាំកំណើត និងប្រាក់ចំណូលរបស់អ្នក ដើម្បីមើលថាតើអ្នកអាចទទួលបានអត្ថប្រយោជន៍​ប៉ុន្មានពីរបបសន្តិសុខសង្គម និងអាយុប៉ុន្មានដែលអ្នកនឹងអាចចាប់ផ្តើមទទួលបានប្រាក់​ទូទាត់ប្រចាំខែពេញរបស់អ្នក។
3. ប្រសិនបើអ្នករួចរាល់ក្នុងការចូលនិវត្ត សូមបង្កើតគណនីរបបសន្តិសុខសង្គមរបស់ខ្ញុំដើម្បីដាក់ពាក្យសុំ។

*ប្រសិនបើអ្នកមិនមានលក្ខណៈសម្បត្តិគ្រប់គ្រាន់សម្រាប់របបសន្តិសុខសង្គមទេ សូមពិចារណាបើកគណនី IRA តាមរយៈទីផ្សារចូលនិវត្តន៍របស់រដ្ឋ Washington (Washington’s Retirement Marketplace)។ វាមានភាពងាយស្រួល និងតម្លៃធូរថ្លៃ!

ការបើកគណនីចូលនិវត្តន៍បុគ្គល (Individual Retirement Account, IRA) គឺជាវិធីងាយស្រួលក្នុងការសន្សំលុយសម្រាប់ការចូលនិវត្តរបស់អ្នក – បន្ថែមពីលើអ្វីដែលអ្នកទទួលបានតាមរយៈគម្រោងចូលនិវត្តន៍ប្រកបដោយសុវត្ថិភាព SEIU 775 (Secure Retirement Plan, SRP) របស់អ្នក។ អ្នកអាចបើកគណនី IRA ដោយខ្លួនឯងត្រឹមតែទឹកប្រាក់ $5 តាមរយៈទីផ្សារចូលនិវត្តន៍របស់រដ្ឋ Washington (Washington’s Retirement Marketplace) ដែលជាដៃគូផ្នែកចូលនិវត្តន៍ដែលទទួលបានការជឿទុកចិត្ត។

លុយដែលអ្នកដាក់បន្ថែមទៅក្នុងគណនី IRA របស់អ្នកនឹងទទួលបានការប្រាក់ និងបូកបន្ថែមបន្តិចម្ដងៗ។

ហេតុអ្វីត្រូវបើកគណនី IRA?

• ត្រឹមតែ $5 ប៉ុណ្ណោះ! ងាយស្រួលនិងតម្លៃទាបក្នុងការបើកគណនី IRA។
• ទឹកប្រាក់របស់អ្នកនឹងកើនឡើងបន្តិចម្ដងៗ។ ទោះបីជាអ្នកអាចដាក់ត្រឹមតែទឹកប្រាក់ចំនួនតិចតួចក៏ដោយនៅក្នុងគណនី IRA របស់អ្នកជារៀងរាល់ខែ រយៈពេលកាន់តែយូរនោះទឹកប្រាក់របស់អ្នកនឹងកាន់តែកើនឡើងនៅពេលអ្នកចូលនិវត្ត។
• មានប្រភពប្រាក់ចំណូលចូលនិវត្តន៍ជាច្រើន។ SRP គឺជាប្រភពតែមួយប៉ុណ្ណោះនៃប្រាក់ចំណូលដែលអ្នកមាននៅពេលអ្នកចូលនិវត្តន៍។ ការសន្សំប្រាក់ផ្ទាល់ខ្លួនរបស់អ្នកតាមរយៈ IRA អាចជួយអ្នកឱ្យចូលនិវត្តន៍កាន់តែមានសុវត្ថិភាព។

សូមស្វែងយល់បន្ថែមអំពីការបើក IRA តាមរយៈទីផ្សារចូលនិវត្តន៍របស់រដ្ឋ Washington (Washington’s Retirement Marketplace) ដែលជាធនធានដែលអាចទុកចិត្តបាន។

ការបើក និងរួមចំណែកដល់គណនីសន្សំផ្ទាល់ខ្លួន គឺជាផ្នែកសំខាន់មួយទៀតនៃការចូលនិវត្ត។ ការសន្សំប្រាក់ត្រឹមតែ 5 ដុល្លារក្នុងមួយខែ នោះអាចធ្វើឱ្យមានការផ្លាស់ប្តូរដ៏ធំមួយនៅពេលដែលអ្នកត្រៀមខ្លួនចូលនិវត្តន៍។

អាចជារឿងពិបាកក្នុងការរៀបចំផែនការសម្រាប់ស្ថានភាពបន្ទាន់ ព្រមទាំងការចំណាយដែលមិនបានរំពឹងទុកដូចជាបង់ថ្លៃវិក្កយបត្រពេទ្យសត្វ ឬបញ្ហារថយន្តជាដើម។ ប៉ុន្តែ ប្រសិនបើអ្នកអនុវត្តតាមជំហានខ្លះៗដើម្បីរៀបចំផែនការ អ្នកអាចបញ្ចៀសមិនឱ្យការចំណាយទាំងនោះក្លាយជាបន្ទុកដ៏ធំបាន។

ខាងក្រោមនេះជាគន្លឹះទាំង 4 ដើម្បីជួយអ្នកចាប់ផ្តើមការស​ន្សំផ្ទាល់ខ្លួនរបស់អ្នក និងសន្សំសម្រាប់ស្ថានភាពបន្ទាន់ផ្សេងៗ៖

• បង្កើតកញ្ចប់ថវិកា។ ចាប់ផ្តើមដោយប្រៀបធៀបចំនួនលុយដែលអ្នករកបានរៀងរាល់ខែជាមួយនឹងចំនួនដែលអ្នកចំណាយជាទូទៅក្នុងមួយខែ។ បន្ទាប់មកអ្នកអាចសម្រេចចិត្តថាអ្នកអាចកាត់បន្ថយការចំណាយលើអ្វីខ្លះ ព្រមទាំងចំនួនលុយដែលអ្នកអាចដាក់ទៅក្នុងគណនីសន្សំបាន។
• បង្កើតការសន្សំប្រាក់ស្វ័យប្រវត្តិជាមួយធនាគាររបស់អ្នក។ អ្នកអាចសម្រេចថាចំនួនប៉ុន្មាន និងញឹកញាប់ប៉ុណ្ណាដែលអ្នកត្រូវដាក់សន្សំ។ សូម្បីតែសន្សំបន្តិចត្រឹមតែ $5 រៀងរាល់ខែក៏អាចបង្កើន​ចំនួនបន្តិចម្ដងៗផងដែរ។
• ដាក់កម្រិតលើការប្រើកាតក្រេឌីត។ កាតក្រេឌីតអាចមានប្រយោជន៍សម្រាប់ស្ថានភាពបន្ទាន់ ប៉ុន្តែវាអាចនឹងងាយធ្វើឱ្យមានការចំណាយជ្រុល ហើយជាលទ្ធផលអ្នកអាចនឹងត្រូវបង់ការប្រាក់បន្ថែមទៀតផង។ ផ្ទុយទៅវិញនៅពេលអ្នកមានគណនីសន្សំប្រាក់សម្រាប់ស្ថានភាពបន្ទាន់ វាអាចជួយអ្នកសន្សំលុយជារួម។
• ប្រៀបធៀបការចំណាយប្រចាំខែ។ ពិនិត្យមើលថាតើអ្នកមានលក្ខណៈសម្បត្តិគ្រប់គ្រាន់ដើម្បីទទួលបានអត្រាធានារ៉ាប់រងរថយន្តកាន់តែទាប ឬព្យាយាមប្តូរទៅគម្រោងទូរសព្ទដែលមិនសូវថ្លៃ។ លុយដែលអ្នកសន្សំអាចដាក់ដោយផ្ទាល់ទៅក្នុងគណនីសន្សំប្រាក់របស់អ្នក!